為上司者
𠵱家好多書本課程網站，教人如何達致成功，乜嘢四個堅持八大原則，乜嘢7C14P，愈多愈好，但對我嚟講，好似大話骰咁，通通都係呃人嘅。
計我話，成功嘅定義因人而異，先唔諗點樣令你成功，而係列舉一張導致失敗嘅清單：平庸，無料，懶散，貪婪，縮骨，無膽，守舊，固執，霸道，虛假，虛偽，貪慕虛榮，貪威識食，好高騖遠，心胸狹窄，肥上瘦下，因循苟且，固步自封，固作神秘，狐假虎威，緊抱權力，委過於人，無容人雅量，見高拜見低踩，揸住雞毛當令箭，唔願意分享資訊，驚死下屬叻過你，對創新意念嗤之以鼻，妄想憑一己之力帶人出紅海，以為一切都係理所當然。
呢啲自取其敗嘅心理習性，都會令人失敗，避開呢啲特質，你就會一步步走向成功，一年唔得，十年都唔得，三十年可能得呢？失敗係兵家常事，無乜大不了。問題係，平情而論，你嘅公司容唔容許失敗及鼓勵創新？你嘅上司腦細，係咪令你心悅誠服，願意死心塌地追隨，抑或諗住收完花紅後，田雞過河，早撇早著。
後記：
過去二十年，由安信年代開始，周不時喺公司內部分享李純恩《為上司者》，用嚟提醒自己，提醒同事。我希望佢哋有用心睇，仲博命做，於願足矣。
Search